CUENTOS EN GUARANI

Che ha nde (ñe'ẽpoty joyvýpe)

Apohára: Narciso R. Colmán

(mitãrusu) (mitãkuña)

Karia'y juky

ma'ẽ sarory,

juru pukavy.

Upévako che Rova morotĩ,

chipa pyrai,

jovaheive'ỹ.

Upévako nde

Karia'y porã

yvápe ĝuarã,

jehayhupyrã.

Upévako che. Juru piriri

japu rereha

ñe'ẽ apoha.

Upévako nde.

Tyvyta jasy,

resa hũ porã

kuña rembiasy.

Upévako che. Ava avovi

typycha pague

avati'ygue.

Upévako nde.

Mitãrusumi

marangatuete,

mba'e potĩete.

Upévako che. Mbatara ĝuaimi,

rova karumbe

jarara kurúpe

nde rejoguaite.

Mitãrusumi

rendyva roky

kumanda peky.

Upévako che. Kuarahy reike,

ára vaiete,

karugua puku.

Upévako nde.

Mba'e potĩete

manduvi tygue

ñu moingoveha

Upévako che. Retyma aysy,

ju'i pakova,

reko tarova.

Upévako nde.

Resa sakuape,

rova pukuete,

retyma ñepã.

Upévako nde. Kuarahy resẽ,

yvoty poty,

mbyja ro'y.

Upévako che.

Ava sarambi

rumby karape

rova karumbe.

Upévako nde.

Guata pyku'i,

rova tupãsy

rete mbokaja.

Upévako che.

Ropepi jo'a,

akã apu'a,

syva karapã.

Upévako nde. Ropea rory,

amambái roky,

resa pykasu.

Upévako che.

Mboriahukuemi,

ao peteĩ,

sapatuve'ỹ.

Upévako nde. Veve kuaaite,

guyra para'i,

sapukái po'i.

Upévako che.

Gríngo sapatu,

kasõ tujakue,

rova ko'ẽngue.

Upévako nde. Resã hũ porã

yvaporũ ayu

apyngua po'i.

Upévako che.

Rembera pokã,

rendyva atã,

rañyka puku.

Upévako nde. Reko kuñarã,

ñe'ẽ yvate,

rembe pytãite.

Upévako che.

Ajúra jare

kure joguaha,

yty reityha.

Upévako nde.

Ñembojarúpe Mitãicha (ñe'ẽpoty)

Haihára: Gumercindo Ayala Aquino

Mba'éiko pe rerekóva

che reindy, che ã raháva,

porãgui rejajaipáva

nde paje piko añete.

Ajevérõ peichaite

aimemíramo nde ypýpe

che akã guive che pýpe

chepirĩmba katuete.

H'ãiténtevako chéve

nendive ñemihaitépe

jaikomi ñe'ẽ mbeguépe

ku mitãicha oñondive.

Ha py'ỹi ijami vove

tajajuecha hi'ãhápe

ha upépe ñemihápe

ñembojarúpe ñaime.

Jaikomínte ku mitãicha

ha tañaime ojoypýpe

mokõivéva pukavýpe

tañama'ẽ ojuehe.

...