Cantar Del Mio Cid

CANTAR DE MÍO CID

•••••••••••••••••••••••••••••••••••••••••••••••••••••••••••••••••••••

De los sos oios tan fuerte mientre lorando

Tornaua la cabeça e estaua los catando:

Vio puertas abiertas e vços sin cannados,

Alcandaras uazias sin pielles e sin mantos,

E sin falcones e sin adtores mudados.

Sospiro Myo Çid ca mucho auie grandes cuydados.

Ffablo Myo Çid bien e tan mesurado:

Grado a ti Sennor Padre que estas en alto,

Esto me an buelto myos enemigos malos.

Alli pienssan de aguiiar, alli sueltan las riendas:

A la exida de Biuar ouieron la corneia diestra,

E entrando a Burgos ouieron la siniestra.

Meçio Myo Çid los ombros e engrameo la tiesta:

Albricia Albar Ffanez ca echados somos de tierra.

Myo Çid Ruy Diaz por Burgos entraua.

En su conpanna LX pendones leuaua: exien lo ver mugieres e uarones.

Burgeses e burgesas por las finiestras son puestos.

Plorando de los oios, tanto auyen el dolor.

De las sus bocas todos dizian una razon:

Dios, que buen vassalo si ouiesse buen sennor!

Conbidar le yen de grado, mas ninguno non osaua,

El rey don Alfonsso tanto auie la grand sanna.

Antes de la noche en Burgos del entro su carta,

Con grand recabdo e fuerte mientre sellada:

Que a Myo Çid Ruy Diaz que nadi nol diessen posada,

E aquel que gela diesse sopiesse una palabra,

Que perderie los aueres e mas los oios de la cara,

E aun demas los cuerpos e las almas.

Grande duelo auien las yentes christianas.

Asconden se de Myo Çid ca nol osan dezir nada

El Campeador adelino a su posada.

Asi commo lego a la puerta falola bien çerrada,

Por miedo del rey Alfonsso que assi lo auie parado:

Que si non la quebrantas por fuerça que non gela abriese nadi.

Los de Myo Çid a altas uoçes laman:

Los de dentro non les querien tornar palabra.

Aguiio Myo Çid, a la puerta se legaua,

Saco el pie del estribera, una feridal daua.

Non se abre la puerta, ca bien era çerrada.

Vna ninna de nuef annos a oio se paraua:

Ya Campeador en buen ora çinxiestes espada.

E1 rey lo ha uedado, anoch del entro su carta,

Con grant recabdo e fuerte mientre sellada.

Non uos osariemos abrir nin coger por nada;

Si non perderiemos los aueres e las casas,

E demas los oios de las caras.

Çid, en el nuestro mal uos non ganades nada,

Mas el Criador uos uala con todas sus uertudes sanctas.

Esto la ninna dixo, e tornos pora su casa.

Ya lo vee el Çid que del rey non auie graçia.

Partios de la puerta, por Burgos aguijaua,

Lego a Sancta Maria: luego descaualga.

Ffinco los ynoios, de coraçon rogaua.

La oraçion fecha luego caualgaua.

Salio por la puerta e en Arlançon posaua.

Cabo essa villa en la glera posaua,

Ffincaua la tienda e luego descaualgaua.

Myo Çid Ruy Diaz, el que en buen ora çinxo espada,

Poso en la glera quando nol coge nadi en casa.

Derredor del vna buenna conpanna.

Assi poso Myo Çid commo si fuesse en montanna.

Vedada lan conprar dentro en Burgos la casa.

De toda cosas quantas son de uianda

Non le osarien uender al menos dinarada.

Martin Antolinez, el burgales conplido,

A Myo Çid e a los suyos abastales de pan e de uino.

Non lo compra ca el se lo auie consigo.

De todo conducho bien los ouo bastidos.

Pagos Myo Çid el Campeador e todos los otros que uan a so en çeruiçio.

Ffablo Martin Antolinez, odredes lo que a dicho:

Ya Canpeador en buen ora fuestes nacido.

Esta noch ygamos e uaymos nos al matino,

Ca acusado sere de lo que uos he seruido.

En yra del rey Alffonsso yo sere metido.

Si con uusco escapo sano o biuo

Aun çerca o tarde el rey querer me ha por amigo;

Si non quanto dexo no lo preçio un figo.

Ffablo Myo Çid, el que en buen ora çinxo espada:

Martin Antolinez, sodes ardida lança:

Si yo biuo doblar uos he la soldada.

Espeso e el oro e toda la plata

Vien lo vedes que yo no trayo auer, huebos me serie

Para toda mi companna.

Ffer lo he amidos, de grado no aurie nada.

Con uuestro consego bastir quiero dos archas.

Yncamos las darena, ca bien seran pesadas,

Cubiertas de guadalmeçi e bien enclaueadas:

Los guadameçis uermeios e los clauos bien dorados.

Por Rachel e Vidas uayades me priuado.

Entrando en Burgos me vedaron conprar, e el rey me a ayrado

Non puedo traer el auer, ca mucho es pesado:

Enpennar gelo he por lo que fuere guisado.

De noche lo lieuen que non lo vean christianos:

Vealo el Criador con todos los sos sanctos.

Yo mas non puedo e amydos lo fago.

Martin Antolinez non lo detarua,

Por Rachel e Vidas apriessa demandaua.

Passo por Burgos, al castiello entraua,

Por Rachel e Vidas apriessa demandaua.

Rachel e Vidas en vno estauan amos,

En cuenta de sus aueres, de 1os que auien ganados.

Lego Martin Antolinez a guisa de menbrado.

O sodes, Rachel e Vidas, los myos amigos caros?

En poridad flablar querria con amos.

Non lo detardan, todos tres se apartaron:

Rachel e Vidas amos me dat las manos

Que non me descubrades a moros nin a christianos;

Por siempre uos fare ricos que non seades menguados.

El Campeador por las parias fue entrado;

Grandes aueres priso e mucho sobeianos:

Retouo dellos quanto que fue algo.

Por en vino a aquesto por que fue acusado.

Tiene dos arcas lennas de oro esmerado.

Ya lo vedes que el rey le a ayrado.

Dexado ha heredades e casas e palaçios.

Aquelas non las puede leuar si non seryen ventadas.

El Campeador dexar las ha en uuestra mano,

E prestalde de auer lo que sea guisado.

Prended las archas e meted las en uuestro saluo:

Con grand iura meted y las fes amos

Que non las catedes en todo aqueste anno.

Rachel e Vidas seyen se conseiando:

Nos huebos auemos en todo de ganar algo

Bien lo sabemos que el algo ganno.

Quando a tierra de moros entro, que grant auer saco!

Non duerme sin sospecha qui auer tiene monedado.

Estas archas prendamos las amas,

En logar las metamos que non sean ventadas.

...